Wenn de Kastanien boid blühn...

...und de Sun durch de Blätter tanzt, dann woass a jeder:
es ist BIERGARTENZEIT

Jetz losst's mi, i muss mi kurz in die Frühjahrs-Biergarten-Romantik neisteigern,
weil seit Tagen zieht’s mi hi –
zum brabbln der Stimm, zum Klirrn der Kriagl, dem Friajahr, des unter de Kastanien beginnt...
ja do hod a imma no Recht da Mo, des hod scho wos und sowieso.

D’Sunn steht scho schiaf, warm und weich auf da Haut.
De Kastanien streck’n boid ihre Blätter aus, als wollt’s sag’n:
„Jetzt geht’s wieda los.“
A leichter Wind geht, und’s übrigbliebene Laub rauscht leise –
glei werd g’sessn, g’lacht, g’lebt, g'essn.

De Leit kemma – in Tracht, in Jeans, mit Radl oda Kinderwogn.
A SCHAUMIGE werd aufg’spuit – eiskalt, g’scheit eingschenkt.
’S Glas is b’schlogn, de Finger gfrorn, aber’s G’sicht des lacht.
„Endlich wieda!“, sagt da oane und da anda nickt bloß.
Mei, wie uns des g’fehlt hat.

De Kinder laffa, schrein, griag’n ihr Eis.
’s tropft ois owe, aber koana sogt wos.
Da Hund bellt, weil’s vui zum Schnüffeln gibt.
Und von hint’n, do hüpft a Spatz auf’n Tisch und schnappt se' a Brezn vom Tisch.

De Leut lach’n. Ganz echt. Aus’m Bauch raus.
Sitz’n zamm, red’n Blädsinn, schaug’n in d’Sunn.
Koana schaut auf d’Uhr.
Koana muaß wo hin.
Des nenna'm mia bairisches Lebensgfui.

Es is wia zruckkema. Zruck ins Leb’n, in d’Freid und Freiheit.
Da Biergarten lebt wieda – und mit ihm mia alle a weng -
also hockts eich hera, sama mehra, bona sera - hier gibt's a neie BIERGARTEN-Blog Ära.

Wem da oane oder andre Rechtschreibfehler z'vui san - des is ma wurscht, weil hier gehts ums echte Lebm und des Gfui und wenn'st beim lesn, nach Fehler gsucht host, dann bist hier eh foisch.

Prost, Bazis auf a scheene und feichtfröhliche, friedliche Biergartensaison 2025!
Eure N.